Wenn du uns’ Lüd kennenlihren wist, denn mösst di woll de Mäuh måken un ehr Språk lihren, so hett dat Fritz Reuter eins meint. Un wisswohrhaftig: Üm siene Bäuker tau läsen, hebben sik Millionen von Läsers mit de nedderdüütsche Språk befåt’, in Berlin, München, Zürich un ok Wien. Fritz Reuter (1810-1874) is in dat 19. Johrhunnert de düütsche Schriewer wäst, denn de mihrsten Lüd lääst hebben. Bet hüt sünd siene Bäuker in twölf Språken œwersett.

Wecker hüt in dat Fritz-Reuter-Literaturmuseum kümmt, ward gewohr warden, dat Reuter siene Bäuker ok hüt ehren Wiert hebben. Un so kann de Besäuker up de Idee un in Vörfreud kåmen, sei tau’n iersten Mål orrer ok ümmer wedder tau läsen. In de Stammutstellung in dat ehemalig Råthus von de Stadt kricht’n up twei Etåschen wat œwer dat Läwen, de Bäuker un dat Warken von dissen nedderdüütschen Schriewer tau weiten. Dor sünd Breiwen un anner mit de Hand schräwen Popieren, Biller, de hei sülfst målt un teikent hett, un Möbelstücken, de em hüürt hebben, utstellt. Ok tau hüren gifft dat wat un för Kinner gifft dat up denn Rundgang de Kinnerstatschonen „för mi“. In dat Filmkabinett warden Films un Fiernseihserien wiest, de nåh Reuter siene Bäuker måkt sünd. För Lüd, de’n Rullstauhl führen, gifft dat ok ’n Lift.

De Måler un Illustrator Ernst Lübbert (1879-1915), de siene Schaultiet in Stemhågen verlääft hett, is ok Themå von dat Museum. Von 2005 an gifft dat in dat Hus 2 de Utstellung „Ernst Lübbert – Läwen un Warken“