Wecker wi sünd – woför wi inståhn

All, de in dat Fritz-Reuter-Literaturmuseum warken daun, drägen de Verantwuurtung för wiertvulle Tüüchnisse ut œwer tweihunnertunföfftig Johren Geschicht un Kunst ut Mäkelborg.
Wi sammeln allens œwer Fritz Reuter un anner nedderdüütsche Schriewerslüd, œwer Ernst Lübbert un ok œwer de Stadtgeschicht von Stemhågen.
Siet mihr as 100 Johren sünd wi Andachtsuurt för denn nedderdüütschen Dichter Fritz Reuter.
Von 1960 an sünd wi anerkennt Forschungsstäd för Läwen un Warken von Fritz Reuter un ok anner nedderdüütsche Schriewer.
Wi sünd de Kultur-Lüchttorm in uns Gägend.

Wi bringen dat modern Museumsmanagement vöran, arbeiten professchonell un mit Schick un Plie.
Wi hollen dat mit Wätenschaft un Service, sünd kreativ un kopmännisch un hollen up disse Oort de Fåhn von Qualität hoch.
Wi ståhn in denn Deinst von uns Gäst un Besäukers, de wi mit Råt tau Siet ståhn.
All, de bi uns warken, vermiddeln Literatur un Kultur an uns Gäst in dat Museum un wiet un siet œwer de Region rut œwerall hen.

Uns Archiven, allens, wat wi sammelt hebben un de wätenschaftlisch Bäukerie ståhn för dat, wat de Reuterstadt Stemhågen von Kultur un Identität her is un ok för de Geschicht von Mäkelborg-Vörpommern.
Allens, wat wi sammelt hebben, gifft dat in heil Düütschland bloots bi uns.
Wi stellen dat poetisch Wark von denn nedderdüütschen Dichter vör, de weltbekannt is. Wi wiesen bannig väl un mit verschieden Medien direktemang in sien Gebuurtshus.
Blot in Stemhågen gifft dat för Besäukers ’ne Utwåhl ut dat Warken von Ernst Lübbert tau bekieken.

De Grotdeil von uns Arbeit is dat Sammeln, Uphägen, Utforschen un Utstellen von allens, wat von dat Läwen un Warken von Fritz Reuter Tüüchnis gifft.
Wi seihn denn Autor Fritz Reuter un sien Wark in denn Tausåmenhang mit de annern groten realistischen Verteller in dat 19. Johrhunnert in Europa un Œwersee.
Wi gåhn scharp in’t Geschirr, üm de nedderdüütsche Språk lebennig tau bewohren.

Uns Dören sünd wiet åpen för de Börgerslüd von Stemhågen un wi sünd verbunnen mit dat Vörankåmen von de Reuterstadt Stemhågen.
Mit Präsentatschonen un Veranstaltungen von hier un hüt trecken wi Lüd ut Stemhågen un von ümtau an un beiden Kultur un Wätenschaft.
Wat wi rutforschen is von Bedüdung för de Lannesgeschicht von Mäkelborg-Vörpommern un för heil Nedderdüütschland un dorœwer rut in de Welt.
Wi willen ok mit Forsch junge Lüd antrecken un Lüd, de sik för Kultur, Wätenschaft un Geschicht interessieren daun.
Kultur is ok Wirtschaft un wi willen mithelpen bi denn Upschwung von de Region Stemhågen un uns Bunnesland Mäkelborg-Vörpommern.
Wi gåhn mit Kråsch an de Upgåf, Nedderdüütsch as Regionalspråk, de in Europa schützt is as all Minnerheitenspråken, tau bruken un wiedertaugäwen. Ümmer so, dat dat för dat Publikum passmåt is.
Wi gäwen uns Herkåmen un wat wi sünd ’n Tauhus mit wiede Puurten för anner, sünd dorbi åpen un tolerant.
De Tourist-Informatschon ünner uns Dack is taustännig för all, de Stemhågen besäuken. Uns Lüd hebben Åhnung un helpen giern.

Wi ståhn dorför, dat jedein uns biläwen kann. Wi sünd inklusiv. Wi sün åpen för all.
As Forschungsstäd gäwen wi all de, de forschen un Wätenschaft bedriewen willen, ein ståtschet Dack œwern Kopp
Wi warken tausåmen mit all Universitäten un all Forschungsstäden.
Wi sünd de Uurt för dat Andenken an Fritz Reuter, ein Hus, wo’n wat lihren un schöne Såken beseihn kann. Wi ståhn in för unsen Billungsupdrach un dorüm is dat Tausåmenwarken mit Kinnergordens, Schaulen un anner ut de Billung von grot Bedüdung för uns.

Wi sünd Deil von Nettwarken un arbeiten mit anner Partners tausåmen.
Wi sünd ünner dat Dack von Verbännen in Mäkelborg-Vörpommern un Düütschland un säkern so de Qualität von uns Arbeit.
Wi hollen de Dören åpen för niege Kooperatschonen mit Partners ut Kultur, Billung, Wätenschaft, Tourismus, Wirtschaft un sünd Partner mit uns Bunnesland MäkelborgVörpommern.

Wi beforschen un finnen Nieget rut œwer de Warken von Fritz Reuter un œwer de nedderdüütsche Språk.
Wi sülfst lihren un kåmen vöran, sünd modern un åpen för de Welt.
Wi nähmen dat as Upgåf, klortaukåmen dormit, dat de Lüd ümmer öller warden un de Demografie sik verännert.
Wi bringen de Verstännigung twüschen de Generatschonen un Integratschon vöran.
Stemhågen ward Kulturmetropole von dat Nedderdüütsche, för dissen Upschwung ståhn wi.
Uns Strategie is, dat uns Museum, de Sammlungen un Depots digitål warden, so dat’n digitål Taugang finnt. Up de anner Siet willen wi ok digitål allens rutposaunen, wat bi uns los is, so dat jedein dat gewohr ward.
Wi warken ok rin de Gesellschaft. Wi fäuhlen uns verantwuurtlich för uns Geschicht un bringen uns in bi gesellschaftlichen Diskurs.