Wat wi sammeln
Kultur vermiddeln, Forschen, Sammeln, Dokumentatschon, Verwohren, Uphägen, Utstellen un Kommunikatschon – dat sünd de Upgåwen von ein Museum. Up disse Oort sünd Museen, Sammlungen un Archive de historisch Brägen un behöllern Kopp un sihr wichtig för de Gesellschaft. Anner Upgåwen sünd konservieren, wat in’t Archiv is un restaurieren von Såken, de’n Schåden hebben. Dat, wat wi hebben, willen wi taugänglich måken un Besäuker Råt gäwen, wenn sei dat Archiv un de Sammlung bi uns in’t Museum beforschen willen. Wat uns noch fählt, willen wi giern tauköpen.
De Archivs von dat Fritz-Reuter-Literaturmuseum beståhn ut fief Sammlungen:
Wat Fritz Reuter schräwen hett
Dat, wat Reuter mit sien eigen Hand schräwen hett, is dat Hart von de Sammlungen von uns Museum. Dat sünd meistendeils Handschriften von Fritz Reuter siene Warken, lütte Versstücken un Prosawarken un ok Breiwen an un von Reuter, åwer ok handschräwen Popieren von sien Verwandtschaft, Fründschaft orrer anner Lüd, de tau glieke Tiet lääft hebben.
Wat anner nedderdüütsche Autoren schräwen hebben
Hier warden Handschriften un Nålass uphäächt von anner nedderdüütsche Schriewer, besünners von Rudolf Tarnow, Wilhelm Zierow un Max Gerhardt.
Billers
Wi sammeln Afbiller von Reuter sülfst, Biller un Teiknungen, de hei sülfst målt hett un ok Illustratschonen tau Reuter sien Wark, åwer ok Bilddokumenten dortau, woans Reuter upun annåhmen wür un tau de Geschicht von de Reuterstadt Stemhågen un ümtau.
Objekten
Wichtig in de Sammlung sünd all Stücken un Såken, de Fritz Reuter sülfst hüürt hebben, siene Fomilie, siene Fründschaft un Bekanntschaft. Anner Objekten sünd tau de Reuterrezeptschon un de Stadtgeschicht von Stemhågen.
Historisch Stadtarchiv
Dokumenten tau de Geschicht von Stemhågen sünd hier uphäächt. Dat Hart von dat Archiv is de so nöömte Olt-Registratur , in weck de Geschicht von de Reuterstadt von 1775 an bet 1933/34 dokumentiert is. Dat sünd Dokumenten, Protokoll- un anner Stadtbäuker.