Fritz Reuter

Fritz Reuter wier de bedüdenst’ düütsche Dichter, de Plattdüütsch schräwen hett. Reuter un Klaus Groth warden för de anseihn, wecke de niege nedderdüütsche Literatur begrünnt hebben.

An denn 07. November 1810 is hei in Stemhågen gebuurn. Sien Vadder wier de Börgermeister Georg Johann Jakob Reuter siene Mudder Johanna Luise Sophie Reuter, geb. Oelpke. För Fritz ward ein Privåtlihrer anstellt, man, de Ünnerricht is nich gaut organisiert un finnt mål statt un mål nich. 1824 ward hei in de Gelihrtenschaul in Fräland upnåhmen. 1831 schafft hei sien Abitur in Parchim. Nu studiert hei tauierst in Rostock, låter in Jena up Rechtswätenschaft. Dor träd’t hei de Burschenschaft „Germania“ bi. Hei keem in denn Verdacht, dat hei sik in de Tiet von denn Vörmärz politisch aktiv wier. So wür hei 1833 in Berlin in Haft nåhmen un 1836 tau’n Dot afurdeilt wägen Majestätsbeleidigung un wiel hei versöcht hebben sall, Hochverråt tau begåhn. De Stråf ward denn åwer ümwannelt tau 30 Johren Haft up ein Festung. Hei wier in verschieden Gefängnisse, so ok up de Festung Dœmz. All 1840 ward hei entlåten. In dat Johr 1842 träd’t Reuter eine Städ as Strom bi einen Gautspächter an un lihrt dor siene Louise kenne, de låter siene Fru ward. Dat Schriewen fangt Reuter 1845 an un gifft dat anonym rut in „Mecklenburg. Ein Jahrbuch für alle Stände“. Låter schrifft Fritz Reuter up, wat hei belääft hett, wat em ok helpt, dormit trecht tau kåmen. Sien Wark is verbunnen mit Satire, Humor un einen kloren Blick up siene Meckelbörger, up Minschen as du un ik. 1857 schrifft hei „Kein Hüsung“, ein soziåle Kritik. 1863 trecken Reuters üm nå Thüringen, nå Eisenach. Ok hier schrifft Reuter niege Warke.

An denn 12. Juli 1874 staarft Reuter in siene Villa in Eisenach. Universål aarft siene Fru Louise. Sei staarft an denn 09. Juni 1894.

Fritz Reuter siene Warke sünd internatschonål œwersett. Sei warden bet hüt up Plattdüütsch orrer as hochdüütsche Œwersettungen lääst.